Սիրելի բարեկամներ,

Ընդամենը 20 տարի առաջ մեզանից ոչ ոք չէր կարող երազել անգամ, որ կգան այսպիսի ժամանակներ, կստեղծվեն նոր տնտեսական հարաբերություններ, զարգացումներ, այլընտրանքային կրթություն, հետևաբար` և մտածողություն: Իսկ այսօր:

Մարդկության պես հին մեր արևաշող երկիրը` պատմության և ճակատագրի մեծագույն փորձություններ անցած Հայաստան աշխարհը, ապրում և զարգանում է քաղաքակիրթ հանրության օրենքներով, ձգտում տեղ զբաղեցնել աշխարհի կայուն երկրների շարքում:

Հայաստանի Հանրապետության ամեն քաղաքացի երազում է տեսնել մեր հայրենիքը բարեկեցիկ, խաղաղ և կրթության երախտավոր երկիր: Այս սկզբունքին հետևում է նաև Կրթության Միջազգային Ակադեմիան, որը կարճ ժամանակում վերաճել է մի մեծ կառույցի` բազմաթիվ ֆակուլտետներով, մասնագիտություններով, բազային քոլեջով, դպրոցով, պոլիկլինիկայով, գիտական կենտրոններով և էլի շատ ու շատ ստորաբաժանումներով, պետության կողմից հավատարմագրված համալսարաններից բաղկացած: Մեր նպատակն է ապահովել բարձրակարգ կրթություն միջին և բարձր մասնագիտական ոլորտում, թողարկել XXI դարի մասնագետներ հետբուհական կրթության ասպարեզում, տեսնել մեր շրջանավարտներին տնտեսության ամենատարբեր ճյուղերում` պատասխանատու դիրքերում: Եվ ոչ միայն մեր հայրենակիցներին, այլև այն բազմաթիվ օտարերկրյա երիտասարդներին, որոնք ընտրել են մեր ուսումնական հաստատությունները:

Օր-օրի աճում և վերելք է ապրում Կրթության Միջազգային Ակադեմիան, և դրա երաշխիքը մեր դասախոսների անձնվեր աշխատանքն է, ռեկտորատի հոգատար վերաբերմունքը և, իհարկե, մեր ուսանողների անմնացորդ նվիրումը իրենց ընտրած մասնագիտությանը, բուհին, նրանց մեծ հավատը ապագայի հանդեպ: Մի իմաստուն ասել է. "Ապագան գուշակելու լավագույն միջոցը այն կառուցելն է": Մենք համոզված ենք , որ մեր համալսարաններում ստացած կրթությունը կօգնի երիտասարդ սերնդին կառուցել իր ապագան այսօր: Ապագա, որ կարող է գեղեցիկ լինել միայն խորը և հստակ գիտելիքների դեպքում, ապագա, ուր մարդը կգնահատվի իր մասնագիտական հմտություններով, ինտելեկտով, աշխատանքի հանդեպ մեծ հարգանքով և անվերջ կատարելագործվելու իր ձգտումով: Այսօր մենք մեր հանրապետության հետ մեկտեղ բազմաթիվ մանր ու մեծ խնդիրներ ենք լուծում, հաղթահարում ենք նոր գաղափարախոսությունից բխող շատ հարցեր, քայլ առ քայլ ինտեգրվում ենք առաջադեմ մարդկության նվաճումներին: Սակայն մենք ունենք նաև մեծ առավելություն. մեզ հասու են մեր ժողովրդի հնագույն կրթական և գիտական ավանդույթները և ողջ մարդկության հազարամյա կենսափորձը:

Մեր առջև է ինտլեկտի անծայրածիր ուղին: Եկեք անցնենք այն միասին:

Սիրով, համագործակցության ակնկալիքով,

Դոկտոր, պրոֆեսոր` Անահիտ Հարությունյան